Псалтирь - Давид царь Страница 8

В конец, в песнях о осмом, псалом Давиду, 6

2 Господи, да не яростию Твоею обличиши мене, ниже гневом Твоим накажеши мене. 3 Помилуй мя, Господи, яко немощен есмь, исцели мя, Господи, яко смятошася кости моя. 4 И душа моя смятеся зело: и Ты, Господи, доколе? 5 Обратися, Господи, избави душу мою: спаси мя ради милости Твоея. 6 Яко несть в смерти поминаяй Тебе: во аде же кто исповестся Тебе? 7 Утрудихся воздыханием моим, измыю на всяку нощь ложе мое, слезами моими постелю мою омочу. 8 Смятеся от ярости око мое, обетшах во всех вразех моих. 9 Отступите от мене, вси делающии беззаконие, яко услыша Господь глас плача моего: 10 услыша Господь моление мое, Господь молитву мою прият. 11Да постыдятся и смятутся вси врази мои, да возвратятся и устыдятся зело вскоре.

Слава: