Павел Михалицын - Молитвы православным святым Страница 2

Икос 6

С светлым лицем представ судилищу цареву, дерзновенно взывал еси, преблаженне, во услышание всех: всецелебная сила моя и слава Христос есть, Истинный Бог, Владыка всех, мертвыя воскрешаяй и всяк недуг отгоняяй. За таковое исповедание ублажающе тя, глаголем:

Радуйся, уста громогласная Божества Христова;

радуйся, языче медоточный, вещаяй Его домостроительство.

Радуйся, ветие превысшаго Богословия;

радуйся, сеятелю мудрый благочестия.

Радуйся, сладкозвучныя веры свирель;

радуйся, славный проповедниче Православия.

Радуйся, прежде смерти явивый дивная;

радуйся, по смерти совершаяй чудная.

Радуйся, зрителю славы Христовой;

радуйся, послушателю молящихся тебе.

Радуйся, подателю милости тоя требующим;

радуйся, ходатаю благ почитающим память твою.

Радуйся, великомучениче и целителю Пантелеимоне.

Кондак 7

Миро излияся на душу твою, богомудрый Целебниче, от Утешителя Духа, темже по смерти честныя останки твоя, благоуханием своим страстей злосмрадие отгоняя, исцеление подают вопиющим верою Богу: Аллилуиа.

Икос 7

Егда узреша идольстии чтители многолетна разслабленна, молитвою твоею, святе, воздвигнута и ходяща, мнози увероваша во Христа; жрецы же бесовстии, завистию снедаеми, подвигоша царя на ярость. Тебе убо, нещадно за Христа стружему и опаляему бывшу, со yмилением зовем:

Радуйся, наслаждения земная презревый;

радуйся, благ вещественных превысший.

Радуйся, яко вся красная мира сего ни во что же вменил еси;

радуйся, яко славу скоротекущую с себе отрясл еси.

Радуйся, неуловим пребывый ловлении Велиара;

радуйся, победивый мучителей коварства.

Радуйся, не пощадивый за Христа жизни своея;

радуйся, враг явивыйся враждебныя плоти.

Радуйся, многобожия широту утеснивый;

радуйся, Божественною силою идолы поправый.

Радуйся, острейшая стрело, язвящая враги;

радуйся, предстателю, заступаяй верующия.

Радуйся, великомучениче и целителю Пантелеимоне.

Кондак 8

Страннолепно являшеся тебе Господь, ободряя и соблюдая в мучениях за имя Его: во образе бо пресвитера Ермолая, клокочущее олово, в неже ввержен был еси, охлади и в мори отрешив велий камень от выи твоей, изведе неврежденна на землю. Ты же, паки представ пред царя, торжественне пел еси Христу Богу: Аллилуиа.

Икос 8

Весь умне на Небеси водворялся, и низу на земли сущих не оставляеши, сопребывая с нами всечестною главою твоею, великий страстотерпче Христов, приемля от Господа и подая просвещение и освящение вопиющим тебе таковая:

Радуйся, премудросте Божественныя исполненный;

радуйся, промышления Божия о нас таинниче.

Радуйся, богомудренных умов услаждение;

радуйся, боголюбивых душ увеселение.

Радуйся, пресветлый Христов бисере;

радуйся, освященный душею и телом.

Радуйся, во дворех перворожденных на Небеси вселивыйся;

радуйся, в присноблаженных обитаяй чертозех.

Радуйся, света Троическаго зрителю;

радуйся, в молитвах к Богу теплый о нас предстателю.

Радуйся, просвещение душам подаваяй;

радуйся, скорбящим утешение низпосылаяй.

Радуйся, великомучениче и целителю Пантелеимоне.

Кондак 9

Всякое естество удивися, Пантелеимоне, сиянию в тебе благодати и богатству добродетелей: ангелоподобней чистоте твоей, великому мужеству в лютых страданиях, крепкой любве ко Христу и многому состраданию к людем, в нихже твориши преславная, во еже пети: Аллилуиа.

Икос 9

Ветии многовещаннии не возмогут по достоянию восхвалити борения твоя, славный добропобедниче, како непобедимою силою Божиею юный леты победи древняго исконнаго врага и посрами идольскую прелесть. Мы же, удивления исполнении, зовем ти:

Радуйся, радостное зрелище Ангелов;

радуйся, благоговейное удивление человеков.

Радуйся, кровь за Христа излиявый и в смерти млеко источивый;

радуйся, тело за Него мученической смерти предавый.

Радуйся, исповедничества правило;

радуйся, доблий воине Царя царей.

Радуйся, тьмы державца победивый;

радуйся, победою твоею небесных и земных обвеселивый.

Радуйся, горняго мира обитателю блаженный;

радуйся, дольняго мира мудрый странниче.

Радуйся, древо, украшенное плодами благодатных дарований;

радуйся, носяй добропобедныя ветви.

Радуйся, великомучениче и целителю Пантелеимоне.

Кондак 10

Сострадания исполнен, яко истинный подражатель Подателя милости Господа, честный страдальче, Пантелеимоном (си есть, всемилостивым) от Него преименован еси, на вся притекающия к тебе милость изливая, юже и нам неоскудно источай, о тебе вопиющим Богу: Аллилуиа.

Икос 10

Стену тя тверду обрет мучитель, никиими же муками победиму покусися сокрушити крепость твою зубы зверей и остриями мучилищнаго колеса, обаче и в сем ничтоже успе: сила бо Христова лютость зверей укроти, а страшнoe коло, на немже обращаемо бе тело твое, абие сокрушися. Тебе убо непобедимому страстотерпцу зовем:

Радуйся, честное Христово избрание;

радуйся, непорочное Богови благоухание.

Радуйся, твердый адаманте Церкве;

радуйся, непоколебимый столпе, досязаяй небесе.

Радуйся, звери видимыя укрощаяй;

радуйся, драконов невидимых сокрушаяй.

Радуйся, обагренный твоею за Христа кровию, срастворенною млеком;

радуйся, неувядаемыя приемый венцы.

Радуйся, радость причинивый Ангелом и человеком;

радуйся, прославленный Богом на Небеси и на земли.

Радуйся, небожителю, ликовствуяй с мученики;

радуйся, насыщаяйся лицезрением Христа пресладким.

Радуйся, великомучениче и целителю Пантелеимоне.

Кондак 11

Песнь исходную приносим твоему за Xриста заколению священному, в немже вместе с кровию млеко истече от тебе, великомучениче, и масличина, под неюже усечен был еси, исполнися целительных плодов. Темже Христу, дивно прославляющему славящия Его, тепле вопием: Аллилуиа.

Икос 11

Светозарная луча был еси, богомудре, во тьме многобожия седящим, путеводящая к Солнцу Правды Христу Богу, Емуже молися, во свете заповедей Его присно пребывати и нам, сицевая радостная тебе приносящим:

Радуйся, пресветлая звездо, на мысленней тверди блистающая;

радуйся, луча, христоименитым людем светящая.

Радуйся, таинственно облиставаемый от Солнца Христа;

радуйся, умне землю обтекаяй.

Радуйся, селение красное Пресвятаго Духа;

радуйся, сосуде пречестный, изливаяй исцеления.

Радуйся, чистоты сокровище;

радуйся, милости тезоимените.

Радуйся, Царствия Небеснаго наследниче;

радуйся, вечныя славы сопричастниче.

Радуйся, предстателю бедствующим в мори житейстем;

радуйся, безсребрениче, помогаяй призывающим тя с верою.

Радуйся, великомучениче и целителю Пантелеимоне.

Кондак 12

Благодати обилие приял еси, преблаженне, по обилию любве твоея ко Христу Богу, Иже и яви тя многоцелебным источником, безмездно врачующим душевныя и телесныя болезни притекающих к тебе с верою и Богу вопиющих: Аллилуиа.

Икос 12

Поюще многострадальныя подвиги твоя за Христа, славный страстотерпче, хвалим долготерпение твое, ублажаем мученическую кончину, почитаем и священную память твою, заступниче наш и целителю, и в похвалу сицевая тебе зовем:

Радуйся, благочестия трубо благозвучная;

радуйся, мечу, посекаяй нечестие.

Радуйся, строганный на древе за Распростершаго руце Свои на древе Крестнем;

радуйся, яко опаляемь за Него, прелести пещь погасил еси.

Радуйся, язвами твоими враги уязвивый;

радуйся, кровию твоею токи идольския крове изсушивый.

Радуйся, в кипящее олово вверженный за Xриста;

радуйся, погруженный за имя Его в водах морских.

Радуйся, промышлением Божиим неврежден в сих пребывый;

радуйся, яко через огнь и воду мучений вшел еси в покой Небесный.

Радуйся, изливаяй неизсякаемыя струи милости верным;

радуйся, благосострадательный врачу, исцеления благодать подаваяй.

Радуйся, великомучениче и целителю Пантелеимоне.

Кондак 13

О многострадальный и предивный страстотерпче Христов и целителю наш Пантелеимоне! Милостиво прием сие малое от нас приношение, от многообразных недугов исцели ны и предстательством твоим сохрани от враг видимых и невидимых и вечнаго мучения избавитися нам Господа умоли, да во Царствии Его выну воспеваем: Аллилуиа.

Этот кондак читается трижды; затем икос 1 и кондак 1.

Тропарь и молитвы святому великомученику Пантелеимону

Тропарь, глас 3

Стpастотеpпче святый и целебниче Пантелеимоне, моли милостиваго Бога, да пpегpешений оставление подаст душам нашим.

Молитва 1-я

О преслaвный мyчениче и доблий воине Небеcнаго Царя, Пантелеимоне всеблажeнне, Милостиваго Бога преизрядный подражaтелю, иже Христа на земли дерзновeнно исповедав, и многообразныя за Него мyки претерпев, неувядaемый приял еси венeц на небеси, идеже вечнаго наслаждaешися блаженства, и со дерзновeнием Престолу трисолнечнаго Божества предстоиши! К твоему христоподражaтельному сострадaнию по Бозе прибегaем вси мы, грешнии, и всеусeрдно молим тя, тeплаго застyпника и предстaтеля нaшего: не престaй призирaти на нaс, сyщих в нyждах и скорбных обстояниих, и твоeю молитвенною помощию и цельбоподaтельною силою избавляй нaс присно от лютых зол, всегубительства и всякия иныя беды и болезни. Ты бо приял еси, святе, неоскyдную благодaть исцелeний от Спаса нaшего Иисуса Христа за твeрдую твою к Нему веру, при чистом и непорочном житии запечатленную муничеством и многопобедною твоeю кончиною, в нeйже по дaнной ти благодaти и наименован от Христа Пантелеимоном, милоcти тезоименитым, милующим всех притекaющих к тебе в скорбех и болезнех. Сего рaди, ведуще тя милостиваго ко всем помощника и целителя, с верою взывaем к тебе: услыши нaс и богоприятным ходaтайством твоим подавaй нaм вся благопотребная в житии сeм и нужная к вечному спасeнию. Мyченическим же дерзновeнием твоим умоли милостиваго Бога, да помилует нaс грешных и недостойных по велицей милости Своeй, да избaвит от трyса, потопа, огня, меча, и всякаго прaведнаго гнева и прещeния, благоврeменне подвизaя нaс к очистительному и умилостивительному во гресех нaших покаянию, рaди множества щедрот Своих, да подaст всем нaм безбедное, тихое и богоугодное житие, православным же властем и воинству нaшему на вся враги победу и одоление, и всех нaс от враг видимых и невидимых да сохранит благодaтию Своeю и непобедимым ополчeнием Ангел Своих, имиже ограждaеми и наставляеми да поживeм в веце сeм в покаянии, чистоте и в творeнии богоугодных дел: да сподобимся же твоим тeплым предстaтельством христиaнскую кончину улучити безболезненну, мирну, непостыдну, и избaвитися от козней воздyшных князeй тьмы и вечныя мyки, и тaко быти наследниками безконeчнаго, всеблажeннаго Царствия. Ей, угодниче Божий! Не престaй молитися за ны, грешныя, да твоим ходaтайством врeменных и вечных бед избaвлени, величaем тебе, застyпника нaшего и молитвенника, и вечно прославляем общаго Владыку и Господа нaшего Иисуса Христа, Емyже подобaет всякая слaва, чeсть и поклонeние со Безначaльным Его Отцeм и Пресвятым Духом, ныне и присно, и во веки веков. Аминь.