Таисия Олейникова - Молитвы к 125 угодникам Божиим Страница 5

Величаем вас, страстотерпцы святии Борисе и Глебе, и чтим честная страдания ваша, яже за Христа претерпели есте.

Варвара, великомученица

(ок. 306; 4/17 декабря)

Великомученице Варваре молятся о том, чтоб не умереть без исповеди и Святого Причащения, об избавлении от скоропостижной или внезапной смерти; у нее просят помощи и заступления за детей, об избавлении от тяжких недугов и болезней.

Святая славная и всехвальная великомученице Христова Варваро! Собраннии днесь в храме твоем божественнем людие, и раце мощей твоих покланяющиеся и любовию целующие, страдания же твоя мученическая в них Самаго Страстоположника Христа, давшаго тебе не точию еже в Него веровати, но и еже по Нем страдати, похвалами ублажающе, молим тя, известная желания нашего ходатаице: моли с нами и о нас умоляемаго от Своего благоутробия Бога, да милостивно услышит нас, просящих Его благостыню, и не отставит от нас вся ко спасению и житию нуждная прошения, и дарует христианскую кончину животу нашему безболезненну, непостыдну, мирну, Божественных Таин причастну, и всем на всяцем месте, во всяцей скорби и обстоянии, требующим Его человеколюбия и помощи, великую Свою подаст милость, да благодатию Божиею и твоим теплым предстательством, душею и телом всегда здравии пребывающе, славим дивнаго во святых Своих Бога Израилева, не удаляющаго помощи Своея от нас, всегда, ныне и присно и во веки веков. Аминь.

Варвару святую почтим: вражия бо сети сокруши и, яко птица, избавися от них, помощию и оружием креста, всечестная.

В Троице благочестно певаемому последовавши Богу, страстотерпице, идольская притупила еси чтилища; посреде же подвига страд ал ьчествующи, Варваро, мучителей прещения не устрашилася еси, мужемудренная, велегласно поющи присно: Троицу чту, Едино Божество.

Величаем тя, страстотерпице Христова Варваро, и чтим честное страдание твое, еже за Христа претерпела еси.

Варсонофий, архимандрит Казанский, епископ Тверской, чудотворец

(1576; 4/17 октября; 11 /24 апреля)

Святителю Варсонофию Казанскому молятся об исцелении болезней, прежде всего глазных.

Приникни, святителю Варсонофие, с горних селений на притекающих к раце мощей твоих и вонми молению их: умоли Господа Бога даровати всем нам, еже ко спасению нашему мы просим у Него при святых мощах твоих. Буди всем нам заступник и ходатай в нуждех наших и прошениих. Умоли Господа Бога даровати крепкий и нерушимый мир, благочиние, просвещение умов и сердец и земли плодоносив, пастырем святыню, законом правду и силу, военачальником мудрость и непобедимое мужество, градоначальником суд, воинству преданность вере и отечеству, неодолимую храбрость, всем же православным христианом здравие и благочестие. Сохраняй обитель твою святую от всех наветов вражиих, да словом и делом прославляется в ней всесвятое имя Отца и Сына и Святаго Духа, ныне и присно и во веки веков. Аминь.

Возвестителю пути спасительнаго, истинный хранителю апостольских преданий, столпе непоколебимый, благочестия учителю и Православия наставниче, святителю Варсонофие, Владыку всех моли мир вселенней даровати и душам нашим велию милость.

Воздержанием тело духу поработив, душу же равноангельну сотворил еси, сего ради святительства саном почтеся, чисте Чистейшему предстоиши. Моли Христа Бога, святителю, спасти люди твоя, святе, да вси вопием ти: радуйся, отче преподобие Варсонофие, граду нашему Казани похвало и утверждение.

Величаем тя, святителю отче Варсонофие, и чтим святую память твою, ты бо молиши за нас Христа Бога нашего.

Василий Великий, архиепископ Кесарии Каппадокийской, вселенский учитель

(379; 1/14 января; 30 января/12 февраля)

Святителю Василию Великому молятся при открытии работ на фабрике, в мастерской и т. д.

О, прелестная и священная главо и благодати Святаго Духа исполненная, Спасово со Отцем обиталище, великий архиерее, теплый наш заступниче, святителю Василие! Предстоя у Престола всех Царя и наслаждался света Единосущныя Троицы и херувимски со Ангелы возглашая песнь трисвятую, великое и неизследованное дерзновение имея ко Всемилостивому Владыце, молися паствы Христовы спасти людей, благостояние святых церквей утверди: архиереи благолепием святительства украси, монашествующих к подвигам добраго течения укрепи, царствующий град и вся грады и страны добре сохрани, и веру святую непорочну соблюсти умоли, мир весь умири, от глада и пагубы избави ны, и от нападения иноплеменных сохрани, старыя утеши, юныя настави, безумныя умудри, вдовицы помилуй, сироты заступи, младенцы возрасти, плененныя возврати, немоществующия исцели, и везде тепле призывающих тя и с верою притекающих к тебе и усердно припадающих и молящихся от всяких напастей и бед ходатайством твоим свободи. Моли о нас Всещедраго и Человеколюбиваго Христа Бога нашего, да и в день страшнаго пришествия Его шуияго стояния избавит нас и радости святых причастники сотворит со всеми святыми во веки. Аминь.

Во всю землю изыде вещание твое, яко приемшую слово твое, имже боголепно научил еси: естество сущих уяснил еси, человеческия обычаи украсил еси. Царское священие, отче преподобие, моли Христа Бога спастися душам нашим.

Явился еси основание непоколебимое Церкве, подая все некрадомое господство человеком, запечатлел твоими веленьми, небоявленне Василие преподобие.

Величаем тя, святителю отче Василие, и чтим святую память твою, ты бо молиши за нас Христа Бога нашего.

Василий, Христа ради юродивый, блаженный, Московский чудотворец

(1552; 2/15 августа)

Блаженному Василию, Московскому чудотворцу, молятся об исцелении от болезней, особенно глазных, об избавлении от пожара, о прекращении начавшегося пожара.

О, великий угодниче Христов, истинный друже и верный рабе Всетворца Господа Бога, преблаженне Василие! Услыши ны, многогрешный, ныне вопиющия к тебе и призывающия имя твое святое: помилуй ны, припадающия днесь к раце мощей твоих, приими малое наше и недостойное сие моление, умилосердися над убожеством нашим и молитвами твоими исцели всяк недуг и болезнь души и тела нашего грешнаго, и сподоби ны течение жизни сея невредимо от видимых и невидимых враг и безгрешно прейти, и христианскую кончину непостыдну, мирну, безмятежну, и Небеснаго Царствия наследие получити со всеми святыми во веки веков. Аминь.

Житие твое, Василие, неложное, и чистота нескверна! Христа ради тело твое изнурил еси постом и бдением, и мразом и теплотою солнечною, и слотою и дождевным облаком, и просветися лице твое яко солнце, и ныне приходят к тебе российстии народи, и вси людие, прославляюще святое твое успение. Тем Христа Бога моли, да избавит ны от варварскаго пленения и междоусобныя брани, и мир мирови подаст и душам нашим велию милость.

Духом Божиим водим, преблаженне Василие, оттряс л еси мирский мятеж, и жития треволнения возгнушался еси, и, совлекся одеяний тленных и облекся в ризу безстрастия, убежал еси ловления льстиваго миродержца, и был еси странен во твоем языце, и паче земнаго богатства избрав богатство небесное, увязлся еси венцем терпения. И ныне, преблаженне Василие, моли Христа Бога о творящих святую память твою, да зовем ти: радуйся, преблаженне Василие.

Ублажаем тя, святый праведный Василие, и чтим святую память твою, ты бо молиши за нас Христа Бога нашего.

Мученицам Вере, Надежде, Любови и матери их Софии

(ок. 230; 17/30 сентября)

Мученицам Вере, Надежде, Любови и матери их Софии молятся о помощи в воспитании детей в христианском благочестии.

О, святыя и достохвальныя мученицы, Веро, Надеждо и Любы и доблестных дщерей мудрая мати Софие, к вам ныне притецем с усердною молитвою, что бо паче возможет предстательствовати за ны пред Господем, аще не вера, надежда и любы, три сия краеугольныя добродетели, в нихже образ нареченныя, самою вещию тыя явисте! Умолите Господа, да в скорбех и напастех неизреченною благодатию Своею покрыет ны, спасет и сохранит, яко Благ есть и Человеколюбец. Того славу, яко солнце незаходимое, ныне зряще святолепну, споспешествуйте нам в смиренных молениих наших, да простит Господь Бог грехи и беззакония наша и да помилует нас грешных и недостойных щедрот Его. Молите убо о нас, святыя мученицы, Господа нашего Иисуса Христа, Емуже славу возсылаем со Безначальным Его Отцем и Пресвятым и Благим и Животворящим Его Духом, ныне и присно и во веки веков. Аминь.

Торжествует церковь первородных, и свеселится, приемля матерь о чадех веселящуюся, яже яко мудрости тезоименитая, тройственным богословским добродетелем равночисленный породи. Тыя с мудрыми девами зрит уневестившияся Жениху Богу Слову. С нею и мы духовне в памяти их свеселимся, глаголюще: Троицы поборницы, Веро, Любве и Над еж до, в вере, любви и надежде утверждайте нас.